Bashkimi Evropian diskuton sanksione të reja ndaj Rusisë, shkak sulmet e fundit

Ministrat e Jashtëm të Bashkimit Evropian u mblodhën në Bruksel për të diskutuar paketën e re të sanksioneve ndaj Rusisë, zhvillimet në Ukrainë dhe çështje të tjera të sigurisë ndërkombëtare.

Shefja e politikës së jashtme të BE-së, Kaja Kallas, tha se blloku synon të arrijë marrëveshje për zgjerimin e listës së sanksioneve me 250 emra dhe se puna po vijon edhe për paketën e 21-të të masave ndëshkuese, për të cilën ende nuk ka konsensus.

Sipas Kallas, sanksionet e reja janë një reagim ndaj sulmeve të fundit të Rusisë kundër civilëve. Ajo bëri të ditur se ministrat do të trajtojnë edhe çështjen e civilëve ukrainas të ndaluar në territoret e pushtuara nga Rusia, përfshirë mësues dhe gazetarë, si dhe fatin e të burgosurve të luftës dhe fëmijëve të rrëmbyer.

Në takim u diskutua gjithashtu strategjia e BE-së për Detin e Zi, me fokus mbrojtjen e infrastrukturës kritike dhe përballimin e kërcënimeve hibride në bashkëpunim me Bullgarinë dhe Rumaninë. Po ashtu, pritet miratimi i një misioni të ri partneriteti për Armeninë, me synim forcimin e kapaciteteve të saj kundër ndërhyrjeve hibride dhe manipulimit të informacionit.

Në axhendë ishte edhe situata në Lindjen e Mesme, përfshirë zhvillimet në Ngushticën e Hormuzit. Kallas theksoi se liria e lundrimit në këtë rrugë strategjike duhet të respektohet dhe se nuk duhet të vendosen tarifa apo kufizime për qarkullimin detar.