BE PO PËRGATIT RREGULLA TË REJA PËR ANËTARËT E ARDHSHËM

_{Foto: KE}

Komisioni Evropian po përgatit një propozim për ndryshimin e rregullave që do të zbatohen për shtetet e reja anëtare të Bashkimit Evropian, në prag të samitit të Këshillit Evropian që nis më 15 tetor 2026, raporton Politico.

Ndryshimet vijnë në një fazë të re të procesit të zgjerimit të BE-së, veçanërisht për Malin e Zi, i cili ka hapur të 33 kapitujt e negociatave dhe deri tani ka mbyllur përkohësisht 18 prej tyre.

Në fund të qershorit, Komisioni Evropian prezantoi edhe një paketë financiare për Malin e Zi, e cila përcakton rregullimet buxhetore pas anëtarësimit në BE.

Ndërkohë, Këshilli i BE-së në prill krijoi një grup pune për hartimin e Traktatit të Anëtarësimit të Malit të Zi.

Këto zhvillime tregojnë se procesi i anëtarësimit po kalon gradualisht nga negociatat për kapitujt individualë drejt përgatitjeve konkrete për anëtarësimin në Union.

Mali i Zi konsiderohet nga Këshilli i BE-së ndër vendet kryesuese të procesit të zgjerimit, ndërsa Qeveria e Malit të Zi ka vendosur si objektiv përfundimin e negociatave deri në fund të vitit 2026.