Kombëtarja e Kosovës ka zhvilluar të enjten seancën e radhës stërvitore në kuadër të përgatitjeve për ndeshjen miqësore kundër Andorrës.

Në këtë seancë, futbollistët dardanë kanë punuar me përkushtim dhe seriozitet maksimal, teksa atmosfera në grup mbetet shumë e mirë. Kombëtares gjatë ditës së enjte iu bashkua edhe portieri i Kosovës U21, Altin Gjokaj, pasi Arijanet Muriq është vendosur të mos ngarkohet më tepër pas shqetësimeve që ka pasur në stërvitjen e së mërkurës.

Portieri Visar Bekaj ka folur për ndeshjen e fundit miqësore ndaj Çekisë në Pragë, ku Kosova pësoi humbje me rezultat 2:1, duke theksuar se këto ndeshje shërbejnë si mundësi për testime dhe për t’u dhënë hapësirë lojtarëve të ndryshëm.

“Në pjesën e parë ndoshta nuk kemi luajtur shumë mirë, por në pjesën e dytë jemi rikthyer. Janë ndeshje testuese dhe besoj që disa lojtarë mund të vijnë në shprehje, të cilët nuk kanë pasur shumë hapësirë më herët. Ndeshja me Andorrën ndoshta duket e lehtë në letër, por nuk ka kundërshtar të lehtë në arenën ndërkombëtare. Duhet të fokusohemi, të japim 100 për qind nga vetja dhe në fund ta shohim rezultatin”, ka thënë Bekaj.

Ai ka theksuar se për të është gjithmonë krenari të jetë pjesë e Kombëtares dhe shpreson ta ketë mundësinë për të kontribuar në ndeshjen ndaj Andorrës.

“E kam thënë shumë herë se është nder të jesh pjesë e Kombëtares. Pastaj, nëse të vjen rasti, është edhe më mirë”, është shprehur Bekaj.

Visar Bekaj, 29-vjeçar, është pjesë e Tiranës, ndërsa me fanellën dardane ka regjistruar nëntë paraqitje.

Dardanët do të vazhdojnë përgatitjet me intensitet të lartë edhe në dy ditët e ardhshme, me synim që në miqësoren ndaj Andorrës të paraqiten me angazhim maksimal dhe të mbyllin këtë grumbullim me rezultat pozitiv.