Berisha sulmon Ballën në Kuvend: Përfaqëson kartelet e drogës, bandat dhe krimin

Kryetari i Partisë Demokratike, Sali Berisha, hodhi akuza të forta ndaj kreut të Grupit Parlamentar të Partisë Socialiste, Taulant Balla, gjatë fjalës së tij në seancën plenare të kësaj të enjteje.

Berisha reagoi pas fjalës së Ballës, duke e akuzuar se është i lidhur me grupet kriminale dhe se ka ndërhyrë në favor të personave të përfshirë në ngjarje të rënda kriminale.

“Parafolësi është përfaqësuesi më i shëmtuar i karteleve të drogës. Është shërbëtori më i shpifur i tyre. Parafolësi është njeriu që ka liruar dy terroristë që vendosën tritolin në shalën e biçikletës së Lulzim Kullës. Parafolësi është negociatori i pazarit të votave“, deklaroi Berisha.

Më tej, kreu i demokratëve pretendoi se Balla ka ndërmjetësuar marrëveshje në favor të personave të botës së krimit, duke përmendur edhe emrin e Suel Çelës.

“Do t’ju lexoj edhe njëherë çfarë bën ky, pazaret që bën ky për makinat e Suel Çelës. Prandaj edhe ata që janë jashtë, me të drejtë kërkojnë fundin e këtij parlamenti, sepse ju përfaqësoni bandat dhe krimin dhe jo qytetarët. Duhet të dëgjohet zëri i tyre“, u shpreh Berisha.