Berisha: Të shkrihet parlamenti, ky është i vetmi vendim i drejtë

Kryetari i Partisë Demokratike, Sali Berisha, ka folur para hyrjes në godinën e Kuvendit, ndërsa jashtë Parlamentit vijon protesta e qytetarëve, të cilët ndodhen pas gardhit metalik të vendosur nga policia.

Berisha tha se Parlamenti duhet të shkrihet dhe se ky është i vetmi vendim i drejtë dhe të dëgjohet zëri i protestës.

“Mblidhet në rrethim. I vetmi akt i përgjegjshëm i tij është të deklarojë fundin e tij, shkrirjen e tij dhe t’i hapë rrugë zgjidhjes që kërkojnë mbarë rinia dhe qytetarët shqiptarë. Çdo akt tjetër është fund e krye i pavlerë. Ndaj, ne kërkojmë sot vetëshpalljen, shkrirjen e këtij parlamenti. Ky është i vetmi vendim i drejtë që Parlamenti mund të marrë sot”, tha Berisha.

Deklarata e Berishës u bë në një kohë kur para Kuvendit vijojnë tensionet mes protestuesve dhe Policisë së Shtetit. Protestuesit kanë tentuar të çajnë gardhin metalik të vendosur përreth institucionit, ndërsa policia ka përdorur autobotin me ujë për t’i shpërndarë.

Në zonë janë vendosur masa të shtuara sigurie për mbarëvajtjen e seancës së fundit plenare të kësaj legjislature.