Berisha udhëzon pedagogët: Bëni gjithçka që kjo protestë të ketë sukses, mos dekurajoni studentët

Kreu i Partisë Demokratike, Sali Berisha, u bëri thirrje pedagogëve dhe studentëve të kontribuojnë në protestën qytetare që po zhvillohet në Tiranë, duke e cilësuar atë si një kauzë të drejtë kundër regjimit autokratik, siç e cilësoi ai. Në fjalën e tij para deputetëve demokratë, Berisha tha se PD e mbështet plotësisht protestën, ndonëse nuk është organizatore e saj.

“Thirrja ime për ju, për pedagogët e universiteteve, është të mendojnë se si të kontribuojnë në këtë protestë. Roli i studentëve dhe roli juaj në mbështetje të saj është i jashtëzakonshëm. Kjo protestë ka zgjedhur rrugën paqësore, strikt paqësore, të përballjes me regjimin. Çka do të thotë që mund të jetë më e zgjatur, por rezultatin do ta ketë.  Nuk ka asnjë lloj mundësie që Edi Rama të shpëtojë nga ky zemërim i përgjithshëm popullor. Dhe ju duhet të bëni gjithçka që ky zemërim të ketë sukses. Kjo revoltë, kjo protestë të përfundojë me sukses. Disa informacione shumë shqetësuese tregojnë se janë bërë presione mbi studentët. Studentët janë në provime. Dhe studentët janë masivisht në protestë, por ka edhe pedagogë që u kanë bërë presion atyre. Ju, në departamentet tuaja duhet të jeni avokatë të studentëve dhe nuk duhet të pajtoheni me asnjë njeri që u bën presion studentëve”.

Berisha tha se opozita ka kundërshtuar në Gjykatën Kushtetuese ndryshimet në ligjin për zonat e mbrojtura, ligjin për administrimin e pasurive kulturore dhe të ashtuquajturën “paketë të maleve”, të cilën ai e konsideroi si favorizuese për investime të dyshimta.

Ai përsëriti gjithashtu akuzat ndaj kryeministrit Edi Rama për manipulim të zgjedhjeve dhe përdorim të institucioneve shtetërore në funksion të pushtetit, pretendime që janë mohuar vazhdimisht nga mazhoranca.