BERLIN – AfD humbet epërsinë në një land gjerman, dy javë para zgjedhjeve

BERLIN, N, 3 shtator /ATSH/ – Dy javë para zgjedhjeve në landin verilindor gjerman Mecklenburg-Vorpommern, Partia Socialdemokrate (SPD) po ngushton ndjeshëm diferencën me Alternativën për Gjermaninë (AfD), sipas një sondazhi të publikuar.

Sondazhi i institutit Infratest dimap, i porositur nga transmetuesi publik NDR, e rendit SPD-në në 32%, vetëm tre pikë përqindje pas AfD-së.

Zgjedhjet në Mecklenburg-Vorpommern do të zhvillohen më 20 shtator, dy javë pas zgjedhjeve në landin fqinj Saksonia-Anhalt, të cilat kanë tërhequr vëmendje të madhe për shkak të mundësisë që AfD, parti e ekstremit të djathtë dhe kundër emigracionit, të kryesojë për herë të parë një qeveri landore.

AfD ka mbajtur për muaj me radhë një avantazh në Mecklenburg-Vorpommern.

Një sondazh tjetër i publikuar të mërkurën nga instituti Forsa e rendiste AfD-në në 37%, kundrejt 28% për SPD-në.

Kryeministrja e landit, Manuela Schwesig, po përpiqet të ruajë postin e saj, pavarësisht pakënaqësisë ndaj qeverisë federale në Berlin, ku socialdemokratët janë partneri më i vogël në koalicionin me konservatorët e kancelarit Friedrich Merz.

Në sondazhin e fundit, Të Majtët renditen të tretët me 11%, ndërsa CDU e Merzit në vendin e katërt me 8%. Ky do të ishte rezultati më i dobët i CDU-së në historinë e zgjedhjeve në një land gjerman.

Pas tyre renditen Të Gjelbrit me 5%, pragu minimal për të fituar mandate në parlamentin e landit, ndërsa Aleanca populiste Sahra Wagenknecht (BSW) merr 4%.

Sondazhi sugjeron se koalicioni aktual i Schwesig me Të Majtët nuk do të kishte mbështetje të mjaftueshme për shumicën, duke hapur mundësinë e krijimit të një koalicioni me tre parti, ku do të përfshiheshin edhe të Gjelbrit.