BERLIN – Wadephul: NATO më e fortë se kurrë pas samitit të Ankarasë

BERLIN, 9 korrik /ATSH-DPA/ – Ministri i Jashtëm gjerman Johann Wadephul tha se nuk beson se NATO është dobësuar nga tensionet e fundit me presidentin e SHBA-së, Donald Trump, duke këmbëngulur se aleanca mbetet e bashkuar pas samitit të saj në Ankara.

“Kjo NATO po qëndron e bashkuar”, tha diplomati i lartë gjerman.

”Në fund të samitit, Trump ka qëndruar qartë në anën e aleatëve evropianë të Shteteve të Bashkuara”, tha Wadephul.

I pyetur nëse NATO ishte afër pikës së thyerjes, Wadephul u përgjigj se “NATO është më e fortë se kurrë.”

Ai përmendi pranimin e fundit të Suedisë dhe Finlandës si provë të besimit në aleancë dhe tha se NATO kishte treguar gjithashtu se ishte e aftë të ofronte mbështetje të fortë për Ukrainën.

Wadephul pranoi se kishte pasur “vërejtje irrituese” gjatë samitit.

“Por, në diskutimet e brendshme, ne ishim shumë të bashkuar dhe shumë të qartë me njëri-tjetrin. Dhe ne gjithashtu i përjetojmë amerikanët në të gjitha strukturat e stafit dhe në të gjitha diskutimet politike brenda NATO-s si shumë të besueshëm”, tha ai.

”Aleatët evropianë po marrin më shumë përgjegjësi brenda NATO-s”, tha Wadephul, duke shtuar se kjo ishte pozitive sepse mund t’i linte ata disi më pak të varur nga të tjerët.

Trump i shpërfilli publikisht aleatët evropianë gjatë samitit të NATO-s në Ankara.

Trump tha se donte të “ndërpriste të gjithë tregtinë” me Spanjën për shkak të shpenzimeve të saj të mbrojtjes dhe refuzimit për të mbështetur luftën në Iran, duke e quajtur vendin një “partner të tmerrshëm”.

Ai gjithashtu e renditi Gjermaninë midis vendeve që tha se e kishin zhgënjyer SHBA-në.

Trump më vonë përdori një ton shumë të ndryshëm në konferencën e tij përmbyllëse për shtyp, duke e përshkruar samitin si “jashtëzakonisht të suksesshëm” dhe duke lavdëruar “dashurinë e jashtëzakonshme” dhe unitetin./  a.jor.