Besart Rama në gjykatë: E pranoj veprimin, por jo tentimvrasjen; mbrojtja kërkon arrest shtëpiak

Arrest shtëpiak në vend të paraburgimit ka kërkuar mbrojtja e Besart Ramës, i akuzuar për tentimvrasjen e Blerim Mustafës në Mitrovicë të Jugut. Në seancën e së mërkurës në Gjykatën Themelore në Mitrovicë, Rama ka deklaruar se e pranon veprimin, por kundërshton kualifikimin juridik të Prokurorisë, e cila e ngarkon për vrasje në tentativë, siç njofton KosovaPress.

Avokati i të pandehurit, Faruk Korenica, ka thënë se mbrojtja e pranon se veprimi ka ndodhur, por jo kualifikimin juridik të tij. “Ne jemi të gatshëm ta pranojmë se veprimi ka ndodhur, por jo kualifikimin”, ka deklaruar Korenica. Edhe vetë Rama është shprehur shkurt në të njëjtën linjë: “E pranoj veprimin të cilin e kam bërë, mirëpo nuk pajtohem me kualifikimin juridik të cilin e ka bërë Prokuroria, pra, rrjedhimisht, nuk e pranoj fajësinë në tërësi sipas aktakuzës”.

Gjatë seancës, Korenica ka kërkuar që paraburgimi të zëvendësohet me arrest shtëpiak, duke theksuar se klienti i tij ndodhet në paraburgim prej gati tre muajsh e gjysmë. Ai ka kujtuar se pardje është marrë vendimi për vazhdimin e paraburgimit dhe se dje mbrojtja ka paraqitur ankesë ndaj atij vendimi, duke shtuar se gjykatësi nuk është i lidhur me kualifikimin juridik të prokurorit.

Kryetari i trupit gjykues, Xhemajil Isufi, ka bërë të ditur se paraburgimi i të akuzuarit është vazhduar për dy muaj më 15 tetor, ndërsa pas ankesës së mbrojtjes, lënda do t’i dërgohet Gjykatës së Apelit për vlerësim. Prokuroria Themelore në Mitrovicë e akuzon Ramën për veprën penale “Vrasje në tentativë”, nga neni 172, lidhur me nenin 28 të Kodit Penal të Kosovës.

Sipas prokurores Albana Parduzi, e cila ka paraqitur pretendimet e aktakuzës, ngjarja ka ndodhur më 18 korrik 2026, rreth orës 01:25, në rrugën “Artim Jashari” në Mitrovicë të Jugut, ku i pandehuri dyshohet se me dashje ka tentuar ta privojë nga jeta të dëmtuarin Blerim Mustafa. Sipas aktakuzës, i dëmtuari ka pësuar lëndime të rënda trupore, të rrezikshme për jetën në momentin e shkaktimit, deri në dhënien e ndihmës së parë mjekësore. Ngjarja ishte raportuar atëkohë edhe nga Policia e Kosovës, e cila kishte bërë të ditur se viktima fillimisht ishte trajtuar në Spitalin Rajonal të Mitrovicës e më pas ishte transferuar në QKUK, ndërsa në vendin e ngjarjes ishte sekuestruar një thikë.