BH – Katër viktima dhe 11 të plagosur nga rrëzimi i helikopterit ushtarak italian

SARAJEVË, 30 tetor /ATSH – ANSA/ – Një helikopter ushtarak italian i tipit “Chinook”, me dy rotorë, është rrëzuar në një zonë fushore të distriktit të Brçkos, në Bosnjë dhe Hercegovinë, duke shkaktuar katër viktima dhe 11 të plagosur.

Në bordin e helikopterit ndodheshin 15 pjesëtarë të misionit evropian EUFOR Althea.

Sipas informacioneve paraprake, mjeti fluturues po lëvizte në lartësi të ulët, kur papritur nisi të rrotullohej rreth vetes, duke kryer një lëvizje spirale në zbritje, përpara se të përplasej me shpejtësi në tokë.

Nga aksidenti humbën jetën katër shtetas italianë: dy ushtarakë të Ushtrisë italiane, rreshterët Simone Ruggia dhe Claudio Marchesi, si dhe dy pjesëtarë të Kryqit të Kuq, togeri Franco Adriano Zecchillo dhe rreshterja Laura Procacci.

Ndërkohë, 11 persona të tjerë mbetën të plagosur, por sipas autoriteteve, asnjëri prej tyre nuk ndodhet në rrezik për jetën.

Ministria italiane e Mbrojtjes ka urdhëruar menjëherë dërgimin e një ekipi mjekësor për të garantuar asistencën e nevojshme për të plagosurit, ndërsa ka nisur edhe një hetim për të përcaktuar shkaqet e aksidentit.

Në vendngjarje ndërhynë shërbimet zjarrfikëse, strukturat e mbrojtjes civile dhe trupat e EUFOR-it.

Operacionet e shpëtimit u vështirësuan veçanërisht nga gjendja e rrënojave të helikopterit dhe nxjerrja e trupave nga pjesët metalike të shkatërruara të tij.

Sipas të dhënave paraprake, dy ushtarakët e viktimave i përkisnin Komandës së Aviacionit të Ushtrisë në Viterbo.

Ata dyshohet se ishin piloti dhe specialisti teknik i helikopterit, të dy pjesë e Regjimentit të Parë “Antares”, me bazë në këtë qytet italian.

Helikopteri “Chinook” dyshohet se ishte nisur drejt Bosnjës të mërkurën në mëngjes nga baza ushtarake në Viterbo. Shkaqet e rrëzimit mbeten ende nën hetim.