BM – Burnham bën thirrje për qetësi në Irlandën e Veriut mes tensioneve për marshimin

LONDËR, 27 shtator /ATSH-DPA/- Kryeministri britanik Andy Burnham bëri thirrje për qetësi në Irlandën e Veriut, pas tensioneve që kanë shpërthyer për një marshim të “Orange Order” (Urdhrit Portokalli) në një zonë kryesisht katolike.

Mijëra protestues u mblodhën në Portadown, për të penguar marshimin.

Një gjykatë kishte vendosur gjatë natës se marshimi mund të zhvillohej.

Marshimi, i njohur si “Marshimi i Drumcree”, është ndaluar që nga viti 1998, pasi në të kaluarën ishte shoqëruar me përleshje dhe dhunë.

Urdhri Portokalli është një organizatë protestante, që tradicionalisht organizon marshime për të shënuar historinë dhe identitetin protestant.

Banorët katolikë të zonës e kundërshtojnë kalimin e marshimit, duke e konsideruar organizatën si diskriminuese ndaj katolikëve.

Burnham tha se nuk duhet të lejohet që progresi i arritur gjatë 28 viteve të fundit në procesin e paqes të vihet në rrezik, dhe u bëri thirrje të gjitha palëve të ruajnë qetësinë.

Sekretari britanik për Irlandën e Veriut, Chris Bryant, shkoi në Belfast për t’u takuar me drejtuesit lokalë.

Ai u bëri thirrje njerëzve të bashkëpunojnë me policinë dhe tha se synimi është që situata të kalojë pa dhunë.

Ndërkohë, kryeministrja e Irlandës së Veriut, Michelle O’Neill, e kundërshtoi zhvillimin e marshimit dhe tha se rikthimi i konfliktit të Drumcree, vë në pikëpyetje progresin e bërë në procesin e paqes.

Në krahun tjetër, Gavin Robinson, drejtues i Partisë Unioniste Demokratike (DUP), tha se vendimi i gjykatës duhet respektuar.

Sipas tij, 35 anëtarë të Urdhrit Portokalli kanë të drejtë të marshojnë në heshtje, në përputhje me vendimin ligjor. /