BM – Një ditë pas incidentit në East Sussex një tjetër tren del nga shinat

LONDËR, 15 gusht /ATSH – AA/ – Një tren doli nga shinat të premten në jug të stacionit Wickford në Essex, më pak se 24 orë pasi dy persona u lënduan rëndë mes 20 të lënduarve në një incident të ngjashëm në East Sussex.

Policia Britanike e Transportit konfirmoi se vagonët e pasmë të trenit dolën nga shinat, por mbetën “në pozicion vertikal”, duke shtuar se “nuk është raportuar për të lënduar”.

“Një problem që aktualisht po hetohet mes Wickford dhe Southend Victoria ka bërë që të gjitha linjat mes këtyre stacioneve të mbyllen”, njoftoi National Rail në një postim në faqen e saj të internetit.

Në deklaratë thuhet se “priten ndërprerje të mëdha” deri në një njoftim të mëtejshëm.

Një hetim është duke u zhvilluar për të përcaktuar shkakun e incidentit të së enjtes, kur tre vagonë dolën nga shinat mes Lewes dhe Haywards Heath.

Incidenti la dy persona të lënduar rëndë, ndërsa 18 të tjerë u dërguan në spital.

Duke folur për Times Radio të premten, deputeti i Lewes, James MacCleary, tha se shqetësimet për përkeqësimin e gjendjes së shinave ishin ngritur një javë para se treni të dilte nga shinat në juglindje të Anglisë të enjten.