BOTËRORI 2026 – Biçikleta dhe ecja, zgjidhja e tifozëve për të mbërritur në stadiume

NJU JORK, 2 korrik /ATSH-AFP/ – Shumë tifozë që po ndjekin ndeshjet e  Kupës së Botës 2026 në zonën e “MetLife Stadium ” në Nju Xhersi po zgjedhin biçikletën ose ecjen në këmbë për të arritur në stadium, pasi transporti publik dhe parkimi janë bërë të kushtueshëm dhe të vështirë.

Familja Tsatsos nga Shtetet e Bashkuara të Amerikës vendosi të parkojë makinën në një restorant pranë stadiumit, të ngarkojë biçikletat në kamionçinë dhe të përshkojë rreth 20 minuta me biçikletë deri në hyrje të stadiumit.

Kryefamiljari, Adam Tsatsos, tha se në vizitën e parë ai dhe djali i tij u dehidratuan duke pritur gjatë për një makinë me qira, ndaj kësaj radhe zgjodhën një alternativë më praktike.

Fillimisht, organizatorët kishin premtuar transport falas për tifozët, si në Botërorin e vitit 2022 në Katar dhe atë të vitit 2018 në Rusi.

Megjithatë, për shkak të vështirësive financiare të qyteteve pritëse, spektatorët duhet të paguajnë vetë kostot e udhëtimit.

Opsioni më ekonomik janë autobusët e organizuar për ditët e ndeshjeve, me një tarifë prej 20 dollarësh vajtje-ardhje. Ndërkohë, udhëtimi me tren drejt stadiumit kushton deri në 98 dollarë vajtje-ardhje, çmim që ka shkaktuar pakënaqësi të madhe te tifozët.

Kelly Wakeman, një tifoze amerikane, e cilësoi tarifën e trenit si të pajustifikuar, duke theksuar se transporti publik nuk duhet të shfrytëzohet për të rritur fitimet gjatë një eventi sportiv ndërkombëtar, sidomos për tifozët që kanë udhëtuar nga vende të tjera.

Për shkak të mungesës së vendeve të parkimit pranë stadiumit, shumë tifozë po parkojnë disa kilometra larg dhe më pas ecin në këmbë deri në stadium.

Kjo praktikë është përhapur edhe në rrjetet sociale, ku tifozët ndajnë këshilla për rrugët dhe vendet më të lira të parkimit.

Edhe vizitorë nga Franca dhe Kanadaja kanë zgjedhur të parkojnë në qytete pranë stadiumit, ku tarifat janë shumë më të ulëta, dhe të vazhdojnë udhëtimin me autobus ose në këmbë.

Për shumë prej tyre, biçikleta dhe ecja janë bërë zgjidhjet më të leverdishme për të ndjekur ndeshjet e Botërorit 2026./  /Ad.Ab./ a.jor.