Braçe: Kompanitë e cigareve duan të përsërisin skemën abuzive

Kryetari i Komisionit parlamentar të Ekonomisë dhe Financave, Erjon Braçe deklaroi të premten se kompanitë e cigareve po kërkojnë të ripërsërisin skemën abuzive të një viti më parë me zhdoganimin e cigareve para hyrjes në fuqi të ligjit për rritjen e akcizës së këtij malli. Braçe ju ka bërë thirje një pjese të kompanive të cigareve se duhet t’i japin fund abuzimit. “Nuk di me ke jeni mësuar! Ndaj boll! Ka 10 ditë sot që nuk ka mbetur njeri që në emër të disa kompanive të cigareve kërkon të dijë nga unë se kur hyn në fuqi ligji për akcizën e re të duhanit, ende i pamiratuar. E dini pse? Që të bëjnë sërish skemën e tyre të abuzimit e të fusin pa mbarim sasi cigaresh tani, për të shmangur tarifën e re të akcizës dhe për të fituar më shumë se ajo në shitje kur ligji të hyjë në fuqi”, shkruan deputeti Braçe në rrjetin social ‘facebook’.
Z.Braçe thotë se kompanitë e cigareve nuk do ta kenë kurrë më këtë marrëdhënie me Komisionin e Ekonomisë dhe se ligji do hyjë në fuqi menjëherë. Më tej, Braçe shkruan se kompanitë e kanë nisur “zanatin” që në gusht, kanë vazhduar në shtator dhe po e intesifikojnë këto ditë, por thotë se kjo do të marrë fund shpejt! “Mos harroni, Kuvendi ka të drejtë të ndryshojë projektligjin që ka ardhur nga Qeveria dhe po ua bëj me dije se në aspektin e administrimit kjo mund të ndodhë në Komision. Ndaj përpiqeni kot. Në anë tjetër, unë personalisht, do kërkoj nga organet fiskale, tatimore kryesisht, të verifikojnë faturë më faturë tatimore, për secilin, çmimi abuziv do hetohet e do tatohet fort”, përfundon komentin e tij Braçe.