Cisterna me gaz të lëngshëm godet një minë në Ngushticën e Hormuzit dhe shpërthen

Një cisternë me gaz të lëngshëm natyror goditi një minë dhe shpërtheu të premten gjatë kalimit nëpër Ngushticën e Hormuzit, njoftoi Garda Revolucionare e Iranit, sipas Associated Press, e cila citon agjencinë shtetërore iraniane të lajmeve IRNA. Sipas njoftimit, anija kishte injoruar paralajmërimet e përsëritura gjatë kalimit në pjesën lindore të ngushticës. Pretendimi nuk mund të verifikohej në mënyrë të pavarur.

Sipas Associated Press, incidenti vjen pas një serie sulmesh ndaj anijeve tregtare në ujërat e kontestuara gjatë javëve të fundit. Tetori pati numrin më të lartë të incidenteve kundër anijeve tregtare në këto ujëra që nga shkurti, kur nisi lufta e Iranit, njoftoi Organizata Ndërkombëtare Detare e Kombeve të Bashkuara.

Sipas Organizatës Ndërkombëtare Detare, 25 detarë kanë vdekur dhe shumë të tjerë janë plagosur ose rezultojnë të zhdukur pas rreth 134 incidentesh në Ngushticën e Hormuzit dhe në zonën më të gjerë detare të Lindjes së Mesme, deri më 11 nëntor. Organizata nuk bëri të ditur se kush qëndron pas incidenteve.

Ngushtica e Hormuzit është një nga rrugët detare më të rëndësishme për transportin e naftës në botë, dhe tensionet atje janë rritur ndjeshëm që nga nisja e luftës mes SHBA-së dhe Iranit, sipas Associated Press.