Çmenduritë e tifozërisë argjentinase. Nga ndalimet në stadiume tek udhëtimi 17 mijë km me biçikletë

Euforia e Botërorit ka përfshirë plotësisht Argjentinën, ku tifozët e “Albiceleste-s” po jetojnë me intensitet të madh ëndrrën e një tjetër triumfi, me Lionel Messin në “vallëzimin e fundit” të tij me kombëtaren.

Në qytete, bare dhe rrjete sociale dëgjohet vazhdimisht thirrja për “katër yje në fanellë”, ndërsa shumë qytetarë po organizojnë udhëtime drejt Shteteve të Bashkuara për të ndjekur ndeshjet nga afër (live).

Në kuadër të iniciativës “Tribune sicure”, autoritetet kanë theksuar se përgjegjësia ndaj fëmijëve është përparësi. Madje, sipas autoriteteve të Buenos Airesit, kush nuk kujdeset për fëmijët e tij nuk do të lejohet të hyjë në stadium.

Në të njëjtën kohë, lista e personave të ndaluar i është dorëzuar edhe autoriteteve amerikane. Ajo përfshin jo vetëm debitorët, por edhe individë të identifikuar më parë nga gjykatat argjentinase për vepra të ndryshme penale. Sipas të dhënave zyrtare, në tre vitet e fundit janë kontrolluar mbi 4 milionë tifozë në ndeshje të ndryshme futbolli, ku janë identifikuar edhe persona me urdhër-arresti aktiv. Lista përfshin gjithashtu individë me histori dhune, me qëllim garantimin e sigurisë gjatë turneut.

Përkundër këtyre masave të rrepta, tifozëria argjentinase po tregon edhe anën e saj më të pasionuar dhe të jashtëzakonshme. Tre çiklistë – Miguel, Vicente dhe Yamandou – kanë bërë një rrugëtim të pabesueshëm prej 17 mijë kilometrash me biçikletë, duke kaluar në 17 vende të ndryshme për të arritur nga Gualeguaychú në Argjentinë deri në Kansas City në SHBA. Udhëtimi i tyre ka zgjatur rreth 9 muaj e gjysmë dhe është ndjekur nga mijëra persona në rrjetet sociale.

Ata kanë përshkruar vështirësi të mëdha gjatë rrugës, veçanërisht në Ande, ku në Peru dhe Bolivi janë përballur me lartësi mbi 4.000 metra që u kanë shkaktuar probleme fizike. Gjithashtu kanë treguar se kanë përjetuar momente rreziku, si një shpërthim në Kolumbi dhe situata të dhunshme në Ekuador, çka i ka detyruar të ndryshojnë rrugën me ndërhyrjen e ambasadës argjentinase.

Pavarësisht sfidave, ata kanë arritur në Kansas City dhe janë pritur nga përfaqësues të federatës argjentinase dhe stafit teknik të kombëtares. Edhe pse kanë takuar figura të rëndësishme të futbollit argjentinas, ëndrra e tyre mbetet të takojnë Lionel Messin, të cilin e konsiderojnë kulmin e këtij udhëtimi të jashtëzakonshëm.

Historia e tifozëve argjentinas tregon dy anë të ndryshme të pasionit për futbollin: nga masat e ashpra ligjore ndaj atyre që nuk përmbushin detyrimet familjare, deri te sakrificat ekstreme të atyre që udhëtojnë mijëra kilometra vetëm për të parë kombëtaren e tyre.