Daçiç: Dënimi ndaj Thaçit, provë se UÇK-ja ishte organizatë kriminale dhe terroriste

Ministri i Brendshëm i Serbisë, Ivica Daçiç, ka reaguar pas dënimit të Hashim Thaçit, Jakup Krasniqit, Kadri Veselit dhe Rexhep Selimit para Dhomave të Specializuara në Hagë, duke e cilësuar atë si “konfirmim të qartë, megjithëse të vonuar” të asaj që, sipas tij, Serbia dhe populli serb e thonë me zë të lartë prej më shumë se një çerek shekulli — se e ashtuquajtura UÇK ishte organizatë kriminale dhe terroriste.

Sipas Daçiçit, vendimi përbën provë ligjore se udhëheqësit më të lartë politikë dhe ushtarakë të UÇK-së janë personalisht përgjegjës për mizoritë, vrasjet, rrëmbimet dhe torturat brutale “të popullit tonë në Kosovë e Metohi”.

Ai shtoi se me këtë vendim, para syve të opinionit botëror u rrëzua përfundimisht, siç u shpreh, “narrativa e rreme, e ndërtuar prej dekadash, për disa ‘heronj kombëtarë’ dhe ‘luftë të drejtë çlirimtare'”.

Daçiç kritikoi gjithashtu faktin që dhoma gjyqësore hodhi poshtë pikat e akuzës për krime kundër njerëzimit, duke e quajtur këtë “manevër skandaloze politike” dhe “fyerje të drejtpërdrejtë për të gjitha viktimat e pafajshme”. Sipas tij, ky “shkurtim ligjor i aktakuzës” është përpjekje frikacake e drejtësisë ndërkombëtare për të zvogëluar përmasat e vuajtjeve të popullit serb dhe për t’u fshehur, siç u shpreh ai, nga “plani i qartë, sistematik dhe monstruoz i spastrimit të plotë etnik dhe zhdukjes së ekzistencës serbe në Kosovë”.

Në fund, ministri serb tha se dënimet e shqiptuara mund të jenë të larta, por nuk mund të jenë kurrë në përpjesëtim me dhimbjen e familjeve që ende kërkojnë të afërmit e tyre.

Burimi: Serbian News Media