Dinamo apo Bylisi? Karriera e lojtarit të Kombëtares U-21 merr kthesën më të keqe

Fabjan Përndreca është rikthyer sërish në fushë. Bylisi e ka dërguar tek ekipi B në Kategorinë e Dytë.

Kalimi te rezervat e Bylisit në futbollin amator, pa që Përndreca të shënonte. Sfida e 8 nëntorit u fitua 2-4 ndaj Albpetrolit.

Kjo është një goditje për 19-vjeçarin, i cili gjatë këtij sezoni nuk mund të largohet nga Shqipëria. Zërat për një transferim jashtë marrin fund, pasi nëse e bën nuk do të mund të aktivizohet.

Një futbollist mund të luajë vetëm për dy klube gjatë sezonit, pavarësisht se ka mundësinë që të transferohet edhe te një i tretë. Përndreca e dogji një mundësi me Dinamon, ndërsa një tjetër tashmë me Bylisin.

Nëse do të ketë lëvizje në merkaton e dimrit, atëherë mund të jetë vetëm te Dinamo ku edhe lejohet aktivizimi. Përndreca është rikthyer në listën e Kombëtares U-21.

Mbrojtësi kishte një mundësi të mirë për të luajtur në Europianin e 21-vjeçarëve. Tashmë çdo gjë vendoset në dyshim, duke qenë se mund ta kalojë sezonin në kategoritë inferiore.