Dogana zbulon 50 mijë euro të padeklaruara në bagazhin e shoferit të autobusit të linjës Itali–Kosovë

Dogana e Kosovës njoftoi sot, më 4 tetor 2026, se në Pikën e Kalimit Kufitar në Merdare janë zbuluar 50 mijë euro të fshehura dhe të padeklaruara. Siç njofton Dogana e Kosovës, shuma u zbulua gjatë kontrolleve të detajuara që po kryhen në hyrje të Kosovës për parandalimin e kontrabandës dhe veprimtarive të paligjshme.

Zyrtarët e Sektorit Antikontrabandë, së bashku me zyrtarët doganorë dhe policorë, kryen kontrolle të detajuara në një autobus të linjës Itali–Kosovë. Gjatë kontrollit, siç njofton Dogana e Kosovës, në bagazhin personal të drejtuesit të autobusit u gjetën 50,000 euro të fshehura dhe të padeklaruara pranë autoriteteve doganore.

Dogana rikujtoi se çdo person që hyn ose del nga Kosova dhe bart me vete 10 mijë euro ose më shumë është i obliguar ta deklarojë shumën pranë zyrtarëve doganorë. Mosdeklarimi i shumave të tilla përbën shkelje ligjore dhe çon në ndalimin e parave.

Dogana nuk ka dhënë detaje shtesë lidhur me destinimin e parave apo masat e ndërmarra ndaj personit të përfshirë.