Dron “armik” godet dy varka peshkimi në jug të ishullit Qeshm, dy peshkatarë rezultojnë të zhdukur

Një dron “armik” ka goditur të shtunën dy varka peshkimi në jug të ishullit iranian Qeshm, në zonën e Ngushticës së Hormuzit, duke lënë dy peshkatarë të zhdukur. Siç njofton Reuters, transmetuesi shtetëror iranian IRIB, duke cituar një zyrtar të provincës Hormozgan, tha se Shtetet e Bashkuara sulmuan dy varkat e peshkimit pranë ishullit Qeshm dhe se nga sulmi dy peshkatarë rezultojnë të zhdukur dhe një tjetër është plagosur.

Një raportim i dytë, i shpërndarë po nga Reuters dhe i atribuar agjencisë gjysmënzyrtare iraniane Fars, e përshkruan sulmin si goditje me dron 14 milje detare në jug të Qeshm-it dhe flet për dy peshkatarë të zhdukur dhe dy të plagosur. Dallimi mes dy raportimeve për numrin e të plagosurve nuk është sqaruar ende nga autoritetet iraniane.

Deri tani nuk ka asnjë konfirmim amerikan për sulmin. Reuters nënvizon shprehimisht se nuk pati konfirmim të menjëhershëm nga Shtetet e Bashkuara për incidentin e raportuar pranë Qeshm-it, ishull që ndodhet në hyrje të Ngushticës së Hormuzit, rruga detare ku javët e fundit janë raportuar një sërë incidentesh me cisterna dhe anije tregtare.

Incidenti raportohet në një moment tensionesh të larta mes Uashingtonit dhe Teheranit, ndërsa përpjekjet ndërmjetësuese për një marrëveshje vazhdojnë dhe palët akuzojnë njëra-tjetrën për shkelje dhe provokime në ujërat e Gjirit. Nëse konfirmohet, goditja ndaj varkave të peshkimit do të shënonte një tjetër përshkallëzim që prek drejtpërdrejt civilët dhe lundrimin në zonë.