Dy rrugët që mund të ndjekë “revolucioni” te Milani. Nga drejtuesit te trajneri, emrat në lojë

Ibrahimović dhe Cardinale po punojnë për të rindërtuar strukturën teknike të Milanit pas largimeve të Igli Tares, Geoffrey Moncadës, Giorgio Furlanit dhe Massimiliano Allegrit në fund të sezonit. Në klub po diskutohen dy drejtime të ndryshme për të ardhmen, veçanërisht sa i përket pankinës.

Opsioni i parë, i mbështetur nga Ibrahimović, parashikon emërimin e Ramon Planes si drejtor sportiv dhe afrimin e Arne Slot si trajner. Holandezi së fundmi zyrtarizoi ndarjen me Liverpool-in, klub me të cilin fitoi Premier League, pasi më parë kishte korrur sukses edhe me Feyenoord në Holandë.

Rruga e dytë brenda klubit favorizon Ralf Rangnick, aktualisht trajner i kombëtares së Austrisë. Gjermani do të kërkonte kompetenca të gjera në menaxhimin e sektorit sportiv dhe do të sillte si trajner Oliver Glasner, i cili vjen pas triumfit në “Conference League” me Crystal Palace dhe ndiqet gjithashtu nga Bayer Leverkusen. Një alternativë tjetër e lidhur me këtë projekt është Matthias Jaissle, aktualisht nën kontratë me Al Ahli.

Drejtuesit e Milanit pritet të zhvillojnë së shpejti një takim me Glasner, madje nuk përjashtohet që kontaktet të intensifikohen që gjatë ditës së sotme. Sa i përket Rangnick, çdo vendim do të varet edhe nga angazhimet e tij me Austrinë, ndërsa Botërori nis pas më pak se dhjetë ditësh.