“E tani, kush është idioti?” – Ivanovska denoncon kontratën e Llotarisë me “Stardust”: u nënshkrua ditën që u mbyll thirrja

Ish-kryetarja e Komisionit Shtetëror për Parandalimin e Korrupsionit të Maqedonisë së Veriut, Biljana Ivanovska, e ka quajtur të parapërgatitur marrëveshjen prej 4.8 milionë eurosh mes Llotarisë Shtetërore dhe kompanisë Stardust për programin e 35-vjetorit të pavarësisë, siç zbuloi Slloboden Peçat përmes dokumenteve të siguruara nga Ministria e Drejtësisë.

Sipas dokumenteve, kontrata është nënshkruar më 8 maj – pikërisht ditën kur u mbyll thirrja publike. Siç shkruan 360 Shkallë, nga kontrata del se deri në fund të asaj dite: u shqyrtua programi prej rreth 100 faqesh nga një komision tre-anëtarësh i kryesuar nga Nikollçe Miçevski – i cili më vonë u shfaq në të njëjtin program si autor i orkestrimeve për tenorin spanjoll Hosé Carreras; u hartua kontrata prej 300 milionë denarësh mes Llotarisë Shtetërore dhe Stardust; dhe ajo u nënshkrua nga drejtori i Llotarisë, Aleksandar Klimovski, dhe menaxherja e Stardust, Mia Miloshevska.

Vetë Klimovski kishte deklaruar në konferencën për shtyp ku dha llogari për paratë e shpenzuara se më 8 maj, në orën 10:41, në zyrat e Llotarisë kishte mbërritur oferta e vetme – rreth 100 faqe nga Stardust.

Detaji tjetër tronditës: Ministria e Drejtësisë e shpalli sponsorizimin e Llotarisë për Stardust si sponsorizim me interes publik në fushën e kulturës vetëm më 16 shtator – pasi festimet kishin përfunduar. Kërkesa e Llotarisë i ishte dërguar ministrisë më 12 gusht, tri ditë pas nisjes së karvanit dhe programit Silno svetnal den.

E tani? Kush është idioti? – shkruan Ivanovska në Facebook, duke shtuar: Pra, gjithçka është e parapërgatitur. Fraza e saj kujton përgjigjen që Boban Millosheski nga Avalon International Booking i dha gazetares së Slloboden Peçat, Mirosllava Simonovska, në konferencën për shtyp para koncertit të David Guetta-s: i pyetur pse nuk publikohej shuma e kontratës, ai u përgjigj A të dukem si idiot?, për të cilën më vonë kërkoi falje publike, duke thënë se kishte reaguar në afekt.

Thirrja publike ishte shpallur më 4 maj me numër 01-35Ц/2026, dhe në të u dorëzua vetëm një ofertë – ajo e Stardust DOOEL Shkup, subjektit përmes të cilit në këtë procedurë vepronte Avalon International Booking. Më 10 shtator, zëdhënësja e qeverisë Marija Miteva dhe drejtori Klimovski njoftuan se 300 milionë denarët ishin siguruar nga fitimi i pashpërndarë i Llotarisë për vitin 2024.

Ky është zhvillimi më i ri hetimor mbi skandalin e shpenzimeve për festimet, pas artikullit të 24 shtatorit ku u raportua për pyetjet e Spasovskit mbi transparencën e 5.53 milionë eurove të shpenzuara.