Të hënën përfundon TVSH-ja preferenciale për naftën, qeveria duhet të vendosë

Të hënën (28 shtator) përfundon periudha e TVSH-së preferenciale për naftën në Maqedoninë e Veriut, dhe deri atëherë qeveria duhet të vendosë nëse kjo masë do të vazhdojë edhe për dy javë të tjera.

Vendimi vjen në një moment kur tregjet e naftës po luhaten nën presionin e krizës në Lindjen e Mesme. Në ditën e fundit të tregtimit, nafta e tipit Brent kushtoi rreth 105 dollarë për fuçi — rreth 2 dollarë më shumë se të premten e kaluar, kur çmimi ishte rreth 103 dollarë.

Në Europë po rritet alarmi për çmimet e karburanteve. Në disa vende janë regjistruar rekorde të reja, ndërsa ekziston frika se një përshkallëzim i mëtejshëm i krizës në Lindjen e Mesme mund të sjellë një valë të re shtrenjtimi.

Ndërkaq, Uashingtoni dhe Teherani kanë shprehur gatishmërinë për deeskalimin. Negociatorët që po bisedojnë në Nju Jork po shohin mundësinë e një marrëveshjeje fazore, që përfshin rihapjen e Ngushticës së Hormuzit nga Irani dhe lehtësimin e bllokadës ekonomike nga Shtetet e Bashkuara.

Të dhënat tregojnë se nafta në disa vende europiane tashmë shitet mbi 2 euro për litër. Maqedonia e Veriut radhitet ndër vendet me çmimin më të lirë — mesatarisht rreth 1,7 euro për litër — ndërsa më e shtrenjta është në Danimarkë, mbi 2,5 euro për litër. Në rajon, në Serbi dhe Slloveni çmimi kalon 2 euro, në Greqi është rreth 2,2, ndërsa në Kroaci rreth 1,9 euro për litër.

Për benzinën, më e lira në Europë gjendet në Turqi, nën 1,5 euro për litër. Maqedonia e Veriut, me rreth 1,6 euro, është ndër vendet me benzinën më të lirë në kontinent, ndërsa më e shtrenjta është në Holandë, rreth 2,5 euro për litër.

Përballë rritjes së çmimeve, disa shtete europiane po marrin masa lehtësuese — nga uljet e taksave dhe vauçerët e karburantit, deri te subvencionet energjetike për kategoritë vulnerabël.

Në Maqedoninë e Veriut aktualisht zbatohet TVSH e reduktuar për naftën, si dhe një ulje e akcizës me 4 denarë për të gjitha llojet e karburanteve.

Kryeministri ka paralajmëruar disa herë se, nëse situata do ta kërkojë, qeveria do të shqyrtojë masa shtesë për të zbutur goditjen e çmimeve dhe për të mbrojtur standardin e jetesës së qytetarëve.

Burimi: Faktor.