EKUADOR – Goditet rrjeti i trafikut të kokainës drejt Evropës, 21 të arrestuar

– Një operacion i përbashkët i autoriteteve të Ekuadorit dhe Spanjës, me mbështetjen e Europol-it, çoi në arrestimin e 21 personave të dyshuar për përfshirje në një rrjet ndërkombëtar të trafikut të kokainës drejt Evropës, sipas “El Pais”.

Mes të arrestuarve është Jackson Felipe Zambrano, i cilësuar nga presidenti i Ekuadorit, Daniel Noboa, si një nga financuesit kryesorë të Wilmer Chavarría, i njohur si “Pipo”, drejtues i organizatës kriminale “Los Lobos”.

Mes të arrestuarve janë edhe dy efektivë policie në detyrë.

Gjatë operacionit të djeshëm, autoritetet kryen 23 kontrolle në provincat Guayas dhe Los Ríos të Ekuadorit.

Sipas Ministrisë së Brendshme të Spanjës, hetimi nisi në tetor 2024, pas sekuestrimit të më shumë se 13 tonëve kokainë në një kontejner me banane në portin e Algecirasit, në Spanjë.

Hetimet identifikuan 14 sekuestrime të lidhura me rrjetin, me një sasi të përgjithshme prej rreth 42,5 tonësh kokainë në Ekuador dhe disa vende evropiane.

Droga dyshohet se sigurohej në Kolumbi, transportohej drejt Ekuadorit dhe më pas dërgohej me rrugë detare drejt Spanjës, Belgjikës, Portugalisë dhe Holandës.

Sipas autoriteteve ekuadoriane, rrjeti përdorte kompani eksportuese të frutave, kakaos, produkteve të detit dhe lëndës drusore për të fshehur ngarkesat e drogës.

Hetuesit po shqyrtojnë gjithashtu lidhjet e dyshuara të organizatës me mafian ballkanike.

Wilmer Chavarría, i njohur si “Pipo”, u arrestua në Spanjë në nëntor 2025, sipas raportimeve të publikuara për çështjen.

Hetimet vijojnë për të përcaktuar përgjegjësinë e personave të arrestuar dhe për të identifikuar lidhjet e tjera të rrjetit.

Të arrestuarit konsiderohen të dyshuar deri në përfundimin e procedurave gjyqësore. /