Momente frike në koncertin e Céline Dion, këngëtarja rrëzohet në mes të performancës

Céline Dion ka përjetuar një moment të frikshëm gjatë koncertit të saj në Paris, pasi është rrëzuar në skenë teksa po performonte një nga këngët e saj të njohura. Megjithatë, këngëtarja e famshme është ngritur menjëherë në këmbë dhe ka vazhduar performancën, duke qetësuar fansat e shqetësuar.

Ngjarja ndodhi të mërkurën, më 7 tetor, në Plenitude Arena, në Nanterre, pranë Parisit, gjatë interpretimit të këngës “Dans un autre monde”, publikuar në vitin 1998.

Në pamjet e publikuara në rrjetet sociale, 58-vjeçarja shihet duke kërcyer dhe duke lëvizur në skenë, përpara se të humbasë ekuilibrin dhe të bjerë në dysheme.

Për fat të mirë, incidenti zgjati vetëm pak çaste. Dion u ngrit menjëherë, u bëri me gishtin e madh fansave në shenjë se ishte mirë dhe vazhdoi të këndonte sikur të mos kishte ndodhur asgjë.

Rrëzimi vjen në një moment të rëndësishëm për këngëtaren kanadeze, e cila është rikthyer në skenë pas një periudhe të gjatë larg koncerteve për shkak të problemeve shëndetësore.

Në vitin 2022, Céline Dion bëri të ditur se vuante nga sindroma e personit të ngurtë (Stiff Person Syndrome), një çrregullim i rrallë neurologjik që mund të shkaktojë ngurtësi të muskujve dhe spazma të dhimbshme. Sëmundja ndikoi ndjeshëm në aftësinë e saj për të performuar, duke e detyruar të anulonte koncerte dhe të tërhiqej për një periudhë nga skena.

Rikthimi i saj në Paris ka qenë veçanërisht emocional, si për këngëtaren, ashtu edhe për fansat që e kanë mbështetur gjatë gjithë kësaj kohe.

Gjatë koncertit të parë të rezidencës, muajin e kaluar, Dion iu drejtua publikut me emocione, duke shprehur mirënjohjen për mbështetjen dhe durimin e treguar ndër vite.

“Bëra një premtim se do të kthehesha dhe do të ngjitesha sërish në skenë”, u shpreh ajo para fansave.