Email-et kërcënuese në institucione, reagon AKSHI: Rasti po hetohet dhe monitorohet

Agjencia Kombëtare e Shoqërisë së Informacionit (AKSHI) ka konfirmuar komunikime me përmbajtje kërcënuese të dërguara në disa adresa elektronike qeveritare që monitorohen nga ky institucion.

Në një postim në rrjetet sociale AKSHI bën me dije se rasti po verifikohet në bashkëpunim me institucionet dhe autoritetet përkatëse, me qëllim sqarimin e plotë të rrethanave.

Agjencia thekson se po monitoron situatën në vijimësi dhe po merr masat e nevojshme, në përputhje me përgjegjësitë institucionale dhe procedurat përkatëse.

Më herët, u raportua për mbërritjen e një email-i kërcënues në disa institucione shtetërore, përfshirë Shkollën e Magjistraturës.

Postimi i AKSHI-t

Vëmendje!

Agjencia Kombëtare e Shoqërisë së Informacionit (AKSHI) ka konstatuar sot komunikime me përmbajtje kërcënuese, të dërguara në disa adresa elektronike qeveritare që monitorohen nga institucioni.

Rasti po verifikohet dhe hetohet në bashkëpunim të ngushtë me institucionet dhe autoritetet përkatëse, me qëllim sqarimin e plotë të rrethanave të ngjarjes.

AKSHI po monitoron në vijimësi situatën dhe po merr masat e nevojshme, në përputhje me përgjegjësitë institucionale dhe procedurat përkatëse.