Energjia e pastër mbulon gjithë kërkesën e re, duke zvogëluar përdorimin e karburanteve fosile, thotë Ember

Shkurtimi i energjisë fosile është në rrugën e duhur, por ngrohja globale mbetet shqetësim

Viti 2025 shënoi një pikë kyçe për energjinë globale, sipas think-tankut të njohur Ember, por ngrohja e shpejtë e planetit vazhdon të jetë një sfidë. Burimet e energjisë me emetime të ulëta mbuluan gjithë kërkesën e re globale për energji elektrike për herë të parë vitin e kaluar, gjë që e kufizoi rritjen e karburanteve fosile.

Energjia diellore luajti rolin kryesor në këtë ndryshim, duke përmbushur tre të katërtat e kërkesës së re prej 849 TWh. Energjia e erës plotësoi pjesën tjetër thuajse totalisht. Të gjitha burimet me emetime të ulëta, duke përfshirë biokarburantet, hidrocentralet dhe energjinë bërthamore, ofruan 42.6 për qind të konsumit global të energjisë prej 31,779 TWh në 2025.

Ndërsa burimet fosile mbizotëronin gjithsesi, Ember deklaron se ky vit shënoi fillimin e rënies së tyre. “Niveli i lartë i vendosjes së energjisë së pastër tani është i mjaftueshëm për të përmbushur kërkesën në rritje,” tha analisti Nicolas Fulghum për Al Jazeera, duke shtuar se pret që në vitet e ardhshme rritja e kërkesës të përmbushet tërësisht nga burimet e pastërt dhe të nisë rënia e gjenerimit fosil.

Ember vlerëson se deri në vitin 2035, pjesa e karburanteve fosile në tregun e energjisë do të bjerë me 10-20 për qind. Megjithatë, kthesa drejt energjisë së pastërt nuk është e mjaftueshme për të arritur objektivin e Parisit për limitimin e ngrohjes globale në 1.5 gradë Celsius. Pajisjet industriale ende kërkojnë kohë për t’u adaptuar dhe për t’u larguar nga varësia ndaj energjisë fosile, veçanërisht në rajone si Europa, Japonia dhe Koreja ku LNG importohet për stabilitetin e sistemit.