Familjarët e vrasësit të policit morën subvencione për bagëtitë ndërsa ai ishte në kërkim

Megjithëse ishte në arrati dhe në kërkim me vendim gjykate, familjarët e Violand Braçellarit kanë përfituar fonde publike për shtimin e bagëtive.

Dokumentet e siguruara tregojnë se babai, nëna dhe vëllai i Braçellarit kanë qenë përfitues të mbështetjes financiare nga Agjencia për Zhvillim Bujqësor dhe Rural (AZHBR) në kuadër të skemave për shtimin e krerëve të gjedhit.

Violand Braçellari, i dyshuar si autori i vrasjes së efektivit të policisë Enea Mekolli dhe plagosjes së kolegut të tij Edison Adri gjatë aksionit të zhvilluar në fshatin Bodë të Lozhanit, konsiderohet një person me rrezikshmëri të lartë shoqërore.

Ai ishte dënuar në mungesë me 10 vite burg për trafikim dhe prodhim të lëndëve narkotike dhe prej vitesh jetonte i fshehur në zonat malore, kryesisht në stane, për t’iu shmangur arrestimit.