Fëmijëria e Celine Dion në një serial televiziv

Një serial televiziv që do të tregojë vitet e para të jetës së Celine Dion është aktualisht në përgatitje.

“Growing Up Dion”, siç është titulli i përkohshëm i projektit, shënon herën e parë që familja e këngëtares së famshme mbështet zyrtarisht një adaptim dramatik të fëmijërisë së saj. Producent i serialit është vëllai i saj, Jacques Dion. Prodhimi bazohet në librin “Dion, A Family Saga”, të shkruar nga nipi i saj, Jimmy Dion.

Seriali do të ndjekë fëmijërinë e Dion në Quebec dhe vitet që formësuan karakterin e saj brenda një shtëpie modeste, por të mbushur me muzikë. Aty, lidhja me nënën e saj, Thérèse, dhe dinamika e ngushtë mes 14 vëllezërve e motrave ndikuan në rrugëtimin e saj drejt suksesit botëror.

Këngëtarja kanadeze konsiderohet një nga artistet më të njohura të të gjitha kohërave. Ajo ka fituar dhjetëra çmime, ka dekada aktive në muzikë dhe shtatë albume të saj kanë shitur mbi 10 milionë kopje secili në mbarë botën.

Së fundmi, Dion zbuloi se po lufton me Stiff Person Syndrome, por gjendja e saj shëndetësore është përmirësuar dhe pritet që së shpejti të shfaqet në Paris, dy vite pas rikthimit të saj live në Lojërat Olimpike.

Përzgjedhja e aktorëve ende nuk është bërë publike dhe vëmendja tashmë është përqendruar te aktorja që do të interpretojë Celine Dion.

Në të kaluarën, ajo është portretizuar nga Valerie Lemercier në komedinë dramatike muzikore Aline të vitit 2021 dhe nga Christine Ghawi në produksionin “Céline” të vitit 2008. Gjithashtu, ajo është interpretuar nga Marla Mindelle në muzikalin satirik të Broadway-t Titanique, një parodi e Titanic që rrëfen ngjarjet e filmit nga këndvështrimi i saj.

/tvklan.al