Festivali i Pranverës, Arsi Bako fiton çmimin e parë me këngën “Humb”

Arsi Bako është shpallur fituese e Festivalit të Pranverës me këngën “Humb”. 

Rezultati përfundimtar u përcaktua nga kombinimi i votave të jurisë profesionale dhe jurisë digjitale, sipas formulës së vendosur nga organizatorët. Arsi Bako grumbulloi gjithsej 260 pikë, duke siguruar jo vetëm fitoren, por edhe një vend të garantuar në Festivalin e Këngës në RTSH, që do të zhvillohet në fund të vitit.

Në vendin e dytë u rendit Herva Novaku me këngën “Zemër në dy hap”, e cila mori 242 pikë, ndërsa në vendin e tretë u rendit Jet me këngën “Në derë do t’i qaj”, që u vlerësua me 174 pikë.

Rikthimi i Festivalit të Pranverës pas më shumë se dy dekadash mungesë u shndërrua në një festë të muzikës shqiptare në Teatrin Kombëtar të Operës dhe Baletit.

Përveç konkurrimit, publiku pati mundësinë të shijonte performanca nga artistë të njohur si Aleksandër Gjoka, Frederik Ndoci, Irma Libohova, Rovena Dilo, Eneda Tarifa, Jonida Maliqi, Dashnor Diko, Adhurim Demiri dhe Renis Gjoka.