FIFA ndalon shishet e ujit nga jashtë stadiumit, tifozët vetëm mund ta blejnë brenda

Kupa e Botës, që nis pas pak ditësh, po merr gjithë vëmendjen, jo vetëm sportivisht. Sipas AFP, FIFA ka deklaruar se “ka vendosur të ndalojë shishet nga jashtë stadiumit. Shishet nga jashtë janë të ndaluara në shumë stadiume për arsye sigurie. FIFA e aplikon këtë masë në të gjitha impiantet e turneut”, – ka thënë një zëdhënës.

Botërori, i organizuar nga SHBA-të, Meksika dhe Kanadaja, zgjat deri më 19 korrik dhe shumë nga 16 stadiumet gjenden në zona të nxehta e me një lagështi mbytëse. Disa stadiume janë të mbyllur dhe me ajër të kondicionuar, por pjesa më e madhe janë të hapur. Në një raport të fundit, klimatologët kanë folur për një ”të nxehtë mbytës”, që mund të ndikojë në çerekun e ndeshjeve të Botërorit, duke përfshirë edhe finalen në New Jersey.

Gjatë Kupës së Botës për klube vitin e kaluar shumë ndeshje u zhvilluan në temperatura më të larta se 32°C dhe me një lagështi që e bënte vapën edhe më të papërballueshme. Për të luftuar të nxehtin në fushë, FIFA ka vendosur një pauzë për t’u freskuar në mes të çdo pjese dhe stola të klimatizuar për stafin dhe skuadrat.

“FIFA punon në bashkëpunim të ngushtë me çdo komitet organizativ të qyteteve pritëse dhe autoritetet lokale në lidhje me mjetet për përballimin e të nxehtit nga tifozët, si ventilatorë, pika hidratimi, tenda freskimi dhe struktura të tjera rreth perimetrit të stadiumit”, – ka shtuar zëdhënsi i organizmit që drejton futbollin botëror.

FIFA ka theksuar gjithashtu se “brenda perimetrit të stadiumit, çmimi i shisheve të ujit do të jetë në linjë me atë të eventeve të tjera të organizuara në çdo stadium”.