FOKUS – Franca përballet me borxh rekord prej 3,6 trilionë eurosh

-Borxhi publik i Francës ka arritur një nivel rekord prej 3.595,5 miliardë eurosh, ose rreth 3,6 trilionë euro, në fund të qershorit 2026, sipas të dhënave të publikuara nga Instituti Kombëtar i Statistikave dhe Studimeve Ekonomike (INSEE), raportoi “Reuters”.

Borxhi u rrit me 59,6 miliardë euro gjatë tremujorit të dytë të vitit, pas një rritjeje prej 75,8 miliardë eurosh në tre muajt e parë.

Në raport me madhësinë e ekonomisë, borxhi arriti në 119% të Prodhimit të Brendshëm Bruto (PBB), nga 117,5% në fund të tremujorit të parë.

Rritja e borxhit vjen në një periudhë presioni të shtuar mbi financat publike franceze, ndërsa vendi i afrohet zgjedhjeve presidenciale të vitit 2027.

Çështja e borxhit dhe e shpenzimeve publike pritet të jetë një nga temat kryesore të debatit politik dhe ekonomik në muajt e ardhshëm.

Shërbimi i borxhit, ose pagesat që shteti duhet të bëjë për interesat e borxhit, po rëndon gjithnjë e më shumë mbi financat publike.

Ndërkohë, kostot e huamarrjes së Francës janë rritur dhe Banka e Francës ka paralajmëruar se vendi duhet të ndërmarrë masa për të frenuar rritjen e borxhit.

Të dhënat e INSEE tregojnë gjithashtu se borxhi neto i Francës arriti në 111,4% të PBB-së në fund të qershorit, nga 109,7% në fund të marsit.

Qeveria franceze po përgatit ndërkohë buxhetin për vitin 2027, në një klimë të vështirë politike dhe ekonomike.

Propozimet për uljen e shpenzimeve publike kanë shkaktuar protesta dhe greva, ndërsa qeveria përballet me presionin për të ulur deficitin dhe për të frenuar rritjen e borxhit. /