FOKUS – Hamasi shpërndan qeverinë ”de facto” civile në Rripin e Gazës

KAJRO/TEL AVIV, 6 korrik /ATSH-DPA/ – Lëvizja palestineze Hamas njoftoi sot shpërndarjen e komitetit që deri tani koordinonte administrimin civil ”de facto” të Rripi i Gazës.

Vendimi u bë publik gjatë një konference për shtyp të mbajtur në Gaza.

Sipas njoftimit, përgjegjësitë e komitetit do t’i kalojnë një organi të ri administrativ të përbërë nga teknokratë të pavarur, ndërsa stafi ekzistues do të vazhdojë të ushtrojë detyrat e tij.

Ky zhvillim sinjalizon gatishmërinë e Hamasit për të hequr dorë nga administrimi civil i përditshëm, por nuk nënkupton tërheqjen e plotë të lëvizjes nga pushteti.

Hamasi vazhdon të kundërshtojë çarmatimin pa kushte, çështje që mbetet një nga pengesat kryesore në negociatat për të ardhmen e Gazës.

Ende nuk është e qartë nëse administrata e re do të mund të nisë punën menjëherë.

Po ashtu, mbetet e paqartë se çfarë roli do të luajë Hamasi në prapaskenë dhe kush do të marrë përgjegjësinë për strukturat e sigurisë në territorin me rreth dy milionë banorë.

Çarmatimi i Hamasit konsiderohet një kusht kyç për krijimin e një administrate të re që mund të fitojë besimin e vendeve donatore dhe organizatave ndërkombëtare, të cilat pritet të financojnë rindërtimin e Gazës pas luftës.

Pasi mori kontrollin e Rripit të Gazës në vitin 2007, Hamasi ngriti një administratë paralele me Autoritetin Palestinez, i cili njihet ndërkombëtarisht dhe e ka selinë në Ramallah, në Bregun Perëndimor.

Ndërsa udhëheqja politike dhe ushtarake e Hamasit merrte vendimet strategjike, “Komiteti për Mbikëqyrjen dhe Koordinimin e Punës së Qeverisë” drejtonte ministritë, institucionet shtetërore, shërbimet publike, administrimin vendor dhe sigurinë e brendshme.

Edhe pse ky komitet funksiononte praktikisht si një qeveri, ai nuk mori kurrë njohje ndërkombëtare. Vendimi për shpërbërjen e tij shihet si një hap i rëndësishëm në përpjekjet për krijimin e një administrate më të pranueshme ndërkombëtarisht për qeverisjen dhe rindërtimin e Gazës./   /Ad.Ab./ a.jor.