FOKUS – Marrëveshje Pentagon-“Lockheed Martin” për 850 avionë “F-35”

UASHINGTON, 22 tetor /ATSH-AFP/ – Pentagoni ka finalizuar një marrëveshje kuadër 10-vjeçare me kompaninë amerikane “Lockheed Martin” për furnizimin me të paktën 850 avionë luftarakë ” F-35″.

Marrëveshja synon forcimin dhe modernizimin e flotës amerikane të avionëve “F-35 Lightning II”, por kërkon miratimin e Kongresit amerikan, i cili duhet të miratojë edhe fondet përkatëse buxhetore.

Vlera e përgjithshme e marrëveshjes nuk është bërë e ditur nga qeveria amerikane apo kompania prodhuese.

Sipas Departamentit të Mbrojtjes, kontrata garanton porositjen e të paktën 850 avionëve gjatë një dekade dhe përfshin pjesë këmbimi, pajisje për përshtatjen e avionëve dhe mirëmbajtjen e të gjithë flotës.

Në këmbim të angazhimit afatgjatë të administratës amerikane, “Lockheed Martin” do të investojë të paktën 7,0 miliardë dollarë për përmirësimin e kapaciteteve industriale dhe logjistike të programit “F-35”.

Kompania deklaroi se marrëveshja do t’i mundësojë ruajtjen e një ritmi të qëndrueshëm prodhimi prej 156 avionësh në vit.

Zëvendëssekretari amerikan i Mbrojtjes, Michael P. Duffey, tha se kombinimi i porosive afatgjata me investimet private do të ndihmojë në forcimin e industrisë amerikane të mbrojtjes dhe në rritjen e kapacitetit për prodhimin e pajisjeve ushtarake në shkallë të gjerë./ /Ad.Ab./ a.jor.