FOKUS – Rusia rinis sulmet masive ndaj Kievit pas armëpushimit të shkurtër

KIEV, 8 shtator /ATSH-DPA/- Rusia ka rinisur sulmet e fuqishme ndaj kryeqytetit ukrainas, Kiev, pas një ndërprerjeje të përkohshme të goditjeve, njoftuan sot zyrtarët ukrainas.

Gjatë natës janë raportuar shpërthime në Kiev. Mbetje të dronëve të rrëzuar kanë rënë mbi ndërtesa banimi, shkolla dhe automjete.

Sipas medieve ukrainase, disa persona mund të kenë mbetur të bllokuar nën rrënojat e një pallati të dëmtuar.

Ekipet e emergjencës dhe mjekët janë dërguar në zonat e goditura.

Të paktën dy persona janë vrarë pasi Rusia rifilloi sulmet e rënda në kryeqytetin ukrainas Kiev pas një armëpushimi të shkurtër, njoftuan zyrtarët ukrainas.

Alarmet për sulme ajrore janë aktivizuar edhe në zona të tjera të Ukrainës.

Sulmet rifilluan pas një pauze treditore, për të mundësuar vizitat në Moskë dhe Kiev të të dërguarve amerikanë Steve Witkoff dhe Jared Kushner, të cilët zhvilluan bisedime me palët për përfundimin e luftës.

SHBA-ja po përpiqet të luajë rolin e ndërmjetësit mes Rusisë dhe Ukrainës, por deri tani nuk është bërë i ditur ndonjë progres i rëndësishëm në negociata. /