FOKUS – Zjarret në Belgjikë përhapen drejt Gjermanisë

BRUKSEL, 16 gusht /ATSH-DPA/ – Një zjarr i egër ka shkatërruar rreth 3 000 hektarë tokë në një rezervat natyror në Belgjikën lindore, afër kufirit gjerman, ndërsa zjarrfikësit po përpiqen ta vënë flakën nën kontroll.

”Një pjesë e frontit të zjarrit prej rreth një kilometri të gjatë po përhapet drejt Gjermanisë”, tha sot një zëdhënëse e qeverisë rajonale.

”Megjithatë, nuk ka asnjë tregues se zjarri do të kalojë kufirin në Gjermani”, tha ajo.

Helikopterë zjarrfikës nga Holanda me rezervuarë të mëdhenj uji u vendosën të dielën në mëngjes për të ndihmuar në ndalimin e përhapjes së zjarrit.

Zjarri, i cili filloi të premten, konsiderohet zjarri më i madh i vendit i regjistruar ndonjëherë, sipas autoriteteve lokale. Ai kishte shkatërruar rreth 2,700 hektarë tokë deri të shtunën në mbrëmje.

Temperaturat ranë gjatë natës në Belgjikë pas një vale të nxehti në fillim të kësaj jave.

Pritet ndihmë nga vendet e tjera të Bashkimit Evropian, pas një kërkese nga Belgjika. Autoritetet lokale thanë se zjarrfikësit nga Gjermania dhe Luksemburgu janë vendosur tashmë në vendngjarje, si dhe dy helikopterë nga Holanda.

Peizazhi i ashpër i rezervatit natyror High Fens po ndërlikon përpjekjet për të shuar flakët, me pak rrugë që ofrojnë akses dhe moçale të gjera torfe që e bëjnë të vështirë shuarjen e zjarreve.

”Zjarri ndryshoi drejtim disa herë gjatë natës për shkak të ndryshimit të erërave”, raportoi transmetuesi RTBF.

Të shtunën, rreth 600 persona u detyruan të evakuoheshin nga dy komuna afër zjarrit./ a.jor.