Franca përballet me vapë ekstreme, temperaturat shkojnë drejt 35°C

Një valë e paparë nxehtësie po godet Francën, ku ditën e djeshme u regjistruan temperatura rekord për muajin maj, ndërsa u raportua një vdekje gjatë një gare rrugore në Paris.

Një pjesëmarrës në një garë vrapimi në kryeqytetin francez ka vdekur dhe rreth dhjetë vrapues në një garë tjetër në një periferi të Parisit u dërguan me urgjencë në spital, tha departamenti i zjarrfikësve.

Sipas shërbimit meteorologjik francez Météo-France, në Paris temperatura tejkaloi 30° Celsius për herë të parë këtë vit të shtunën, duke arritur në 31.9° Celsius.

Kjo “valë e hershme dhe e dukshme e nxehtësisë”, sipas Météo-France, është për shkak të një “kupole termike” mbi Francën , një zonë me presion të lartë që bllokon ajrin e ngrohtë nga Afrika e Veriut. Pritet që ajo të intensifikohet më tej sot.

Një total prej 13 rajonesh në Francën perëndimore janë vënë në alarm të verdhë për valë të nxehti , niveli i parë i alarmit, për herë të parë për muajin maj që nga viti 2004, kur u krijua ky sistem.

Temperaturat gjatë ditës së djeshme në shumë zona kanë tejkaluar 30 gradë Celsius.

Sipas të dhënave paraprake nga Météo-France, rekordet për muajin maj u thyen të dielën në të paktën dhjetë stacione meteorologjike, përfshirë atë në Brest në Francën perëndimore, ku zhiva arriti në 29.8°C, duke thyer rekordin e vendosur në maj 2017. Temperaturat pritet të arrijnë 35°C në Francën perëndimore sot.

Siç theksoi Météo-France, kjo valë e hershme e nxehtësisë “do të jetë afatgjatë” dhe mund të vazhdojë të paktën deri në fillim të javës së ardhshme.

Shkencëtarët e klimës paralajmërojnë se valët e përsëritura të të nxehtit janë një shenjë e qartë e ndryshimeve klimatike, të nxitura kryesisht nga djegia e lëndëve djegëse fosile. Këto valë të nxehti pritet të bëhen më të shpeshta, më të gjata dhe më intensive.