FRANCË – 500 shkolla të mbyllura, përleshje me policinë dhe dhjetëra të plagosur

– Protestat masive të studentëve në Francë, kanë hyrë në javën e tyre të dytë, për shkak të gjendjes së amortizuar të shkollave dhe klasave, mbipopullimit dhe mungesës së mësuesve, raportoi “Reuters”.

Protestat dhe bllokimet e shkollave tregojnë tensionet e forta sociale në Francë, ndërsa qeveria po përpiqet të miratojë buxhetin për vitin 2027, me synim uljen e deficitit.

Javën e kaluar, interesi i obligacioneve 10-vjeçare franceze kaloi për pak kohë 5%, niveli më i lartë që nga viti 2002, duke rritur shqetësimet e investitorëve për gjendjen financiare të vendit.

Ministri i Arsimit, Edouard Geffray tha dje në mbrëmje se 400 deri në 500 shkolla të mesme, nga gjithsej rreth 3,700 në vend do të ishin plotësisht ose pjesërisht të mbyllura.

Protestat nisën në fund të shtatorit në një shkollë të mesme në periferi të Parisit, për shkak të mungesës së mësuesve, dhe më pas u përhapën në të gjithë Francën.

“Prioriteti ynë është rikthimi i rendit”, deklaroi zëdhënësja e qeverisë, Maud Bregeon.

Sipas ministrit Geffray, që nga fillimi i protestave, 24 shkolla janë djegur ose dëmtuar rëndë, ndërsa 78 pjesëtarë të stafit mësimor janë plagosur.

Përplasje mes policisë dhe nxënësve

Media franceze raportoi sot për përplasje mes policisë dhe nxënësve në Lille, ndërsa në Toulouse u përdor gaz lotsjellës.

Që nga e hëna e kaluar, rreth 5 000 persona, kryesisht të rinj, janë arrestuar në të gjithë vendin.

Dhjetëra persona janë plagosur, ndërsa janë raportuar sulme ndaj mësuesve dhe qytetarëve. Dëmet materiale vlerësohen në dhjetëra milionë euro.

Qeveria franceze ka njoftuar se do të përshpejtojë shqyrtimin e një projektligji në parlament më 27 tetor, i cili parashikon që personat që dëmtojnë prona gjatë protestave, të jenë financiarisht përgjegjës për dëmet.

Shefi i policisë së Parisit, Patrice Faure, u bëri thirrje nxënësve të ndalojnë bllokimet e shkollave dhe të zhvillojnë protesta paqësore. Ai tha se organizatorët fillestarë të protestave tashmë nuk e kanë më kontrollin mbi zhvillimet.

Megjithatë, sindikatat e nxënësve kanë bërë thirrje që nesër të zhvillohen protesta në të gjithë Francën.

Autoritetet e sigurisë druhen se protestat, kryesisht në qendër të Parisit, mund të shoqërohen me dhunë të mëtejshme dhe se grupe të ekstremit të majtë dhe anarkistë mund të përpiqen t’i marrin nën kontroll ato. /