Gashi: Integrimi europian duhet të sjellë standard më të mirë jetese për qytetarët

Kryetari i Kuvendit të Maqedonisë së Veriut, Afrim Gashi, deklaroi sot në Forumin Qytetar “Maqedonia e Veriut dhe e ardhmja e Europës: Qytetarët në zemër të zgjerimit të BE-së”, që po mbahet në Shkup, se integrimi europian nuk është vetëm një proces i harmonizimit të ligjeve, plotësimit të kritereve dhe hapjes e mbylljes së kapitujve. Ai, mbi të gjitha, është një proces që duhet të mundësojë ndryshim rrënjësor të sistemit në funksion të një standardi më të mirë jetese për të gjithë qytetarët.

Sipas Gashit, anëtarësimi në BE duhet të nënkuptojë arsim dhe shëndetësi më të mirë, vende pune dinjitoze, institucione funksionale, drejtësi të barabartë për të gjithë, luftë të vendosur kundër korrupsionit dhe kushte të tilla që të rinjtë ta shohin të ardhmen e tyre në vend. “Zëri juaj ka rëndësi. Pritshmëritë tuaja kanë rëndësi. Kritikat tuaja kanë rëndësi”, tha ai, duke theksuar se rruga europiane nuk mund të udhëhiqet vetëm në institucione, por qytetarët duhet të përfshihen vazhdimisht në krijimin e politikave.

Forumi zhvillohet në bashkëpunim me Parlamentin Europian dhe në të marrin pjesë qytetarë, deputetë, eurodeputetë dhe ekspertë. Gashi tha se komunikimi i drejtpërdrejtë është një mundësi për të diskutuar hapur sfidat e rrugës europiane. Ai kujtoi se forumi vjen pas mbledhjes së Komitetit të Përbashkët Parlamentar në Kuvend, ku deputetët maqedonas dhe eurodeputetët miratuan rekomandime të përbashkëta për prioritetet kyçe reformuese.

“Të mos lejojmë që agjenda europiane të mbetet vetëm agjendë institucionale. Ta kthejmë në agjendë qytetare”, u shpreh Gashi, duke shtuar se integrimi europian duhet të jetë një përcaktim mbi partiak dhe afatgjatë, me mbështetje të gjerë shoqërore. Ai iu drejtua edhe partnerëve europianë: Maqedonia dëshiron të jetë pjesë e BE-së, por pret që standardet europiane të bëhen realitet për çdo qytetar në vend, ndërsa Kuvendi ka përgjegjësi të veçantë përmes parlamentit të hapur, proceseve transparente dhe dialogut të vazhdueshëm.

Burimi: Makfax