GJELOSHAJ: CAMAJ DHE ÇOBI DO TË VOTOJNË PËR SHKARKIMIN E MANDIQIT

_{Foto: Kuvendi i Malit të Zi / Skupština Crne Gore}

Kreu i Forumit Shqiptar, Nik Gjeloshaj, ka bërë të ditur se shefi i Grupit Parlamentar të kësaj force politike, Artan Çobi, ka nënshkruar iniciativën për shkarkimin e kryetarit të Kuvendit të Malit të Zi, Andrija Mandiq, në përputhje me vendimin unanim të Kryesisë së Forumit Shqiptar.

Gjeloshaj tha se me të njëjtin vendim është përcaktuar që të dy deputetët e Forumit Shqiptar, Nikollë Camaj dhe Artan Çobi, do të votojnë pro shkarkimit të Mandiqit.

“Forumi Shqiptar dhe unë personalisht e kemi respektuar fjalën e deputetit tonë Nikollë Camaj se nuk do të nënshkruajë iniciativat e PDS-së. Megjithatë, kjo nuk e vë në pikëpyetje votën e tij, e cila do të jetë në përputhje me vendimin unanim të Kryesisë”, deklaroi Gjeloshaj.

Ai kërkoi nga mediat që të bëjnë dallim të qartë mes nënshkrimit të iniciativës dhe votimit për shkarkimin e Mandiqit, duke theksuar se bëhet fjalë për dy veprime të ndryshme.

“Ju lutem mediave që të dallojnë qartë deklaratën e kolegut Camaj lidhur me nënshkrimin e iniciativës nga votimi për shkarkimin, pasi bëhet fjalë për dy veprime të ndryshme”, deklaroi Gjeloshaj.