Gjiknuri firmos anullimin e 14 kontratave koncesionare

Ministri i Energjisë dhe Industrisë, Damian Gjiknuri firmosi anulimin e 14 kontratave koncesionare për ndërtimin e 30 hidrocentraleve, në të cilat janë konstatuar mangësi ligjore dhe mosrespektim i kontratave.

Ndër HEC-et e anuluar janë ai i Egnatias, Domajt, Steblevës, Stojan dhe disa të tjerë në rrethin e Tepelenës dhe atë të Librazhdit. Sipas burimeve nga Ministria e Energjisë dhe Industrisë gjatë proçesit të kontrollit janë vërejtur një numër jo i vogël shkeljesh të kushteve kontraktore, që lidhen me gjithë fazat zinxhir të konçesionit, nga dhënia e tyre dhe deri tek përmbushja e kushteve.

Burimet thanë se privatët nuk kanë përmbushur kushtin e regjistrimit në kohë të shoqërisë pranë QKR-së, kanë treguar vonesa në paraqitjen e projekteve dhe në shumë raste kanë vepruar si sekserë duke transferuar apo shitur konçesionet pa miratimin e ministrisë.

Nga verifikimet në këto kontrata, theksuan burimet është konstatuar në këtë grup HEC-esh cilësia e ulët e investitorëve nga pikëpamja teknike, por edhe ajo financiare, si dhe mungesa të theksuara të zbatimit të legjislacionit për shoqëritë tregtare.

Ministria bën të ditur se kjo është faza e parë e kontrollit, ndërkohë që po vazhdon auditi i të gjitha kontratave konçesionare për të parë përputhshmërinë e tyre me detyrimet ligjore.