Skenderaj, arrestohen dy të mitur që përplasën veturën e policisë, dy zyrtarë u lënduan

Dy të mitur janë arrestuar të hënën, më 26 tetor, nën dyshimin se kishin marrë një veturë në mënyrë të kundërligjshme dhe, gjatë përpjekjes për t’iu shmangur policisë, kishin goditur një automjet zyrtar në Skenderaj, duke e nxjerrë nga rruga, siç ka njoftuar Policia e Kosovës, përcjell Urgjent.com. Si pasojë e incidentit, dy zyrtarë policorë kanë pësuar lëndime trupore dhe kanë pranuar trajtim mjekësor.

Sipas njoftimit të Policisë që e përcjell Urgjent.com, hetuesit e Sektorit Rajonal të Hetimeve në Mitrovicën e Jugut i kanë identifikuar dhe arrestuar dy të miturit dy ditë pas incidentit të rëndë që kishte ndodhur më 24 tetor në Skenderaj. Njëri prej tyre dyshohet se ishte drejtuesi i automjetit, ndërsa tjetri pasagjer.

Incidenti kishte ndodhur mbrëmjen e 24 tetorit, rreth orës 21:45, kur patrulla policore kishte vërejtur një veturë me targa të Kosovës që po kryente manovra të rrezikshme në trafik. Gjatë përpjekjes për ta ndaluar, drejtuesi e kishte goditur veturën zyrtare të Policisë, e cila kishte dalë nga rruga dhe ishte përplasur me një shtyllë elektrike. Vetura e dyshuar ishte gjetur më pas e aksidentuar dhe e braktisur në një fshat të Komunës së Skenderajt.

Intervistimi i të miturve është zhvilluar në përputhje me procedurat ligjore për personat e mitur. Pas intervistimit, me vendim të prokurorit kompetent, të dy janë liruar dhe rasti do të vazhdojë në procedurë të rregullt, njofton Policia e Kosovës.

Ndaj të miturit që dyshohet se drejtonte automjetin janë iniciuar raste për veprat penale “Sulm ndaj personit zyrtar” dhe “Marrje në posedim të pasurisë së luajtshme”. Hetimet për zbardhjen e plotë të rrethanave të incidentit vazhdojnë.