Gjini: Shifrat e NDI-së janë alarm, Kosova po shkon në drejtim të gabuar

Kryetari i Aleancës, Ardian Gjini, ka reaguar pas publikimit të rezultateve të raportit të fundit të NDI-së, duke thënë se të dhënat e publikuara janë dëshmi e përkeqësimit të gjendjes në Kosovë dhe nevojës për një ndryshim të madh politik.

Gjini ka deklaruar se rritja e numrit të qytetarëve që besojnë se vendi po shkon në drejtim të gabuar, si dhe rritja e dëshirës për largim nga Kosova, janë sinjale alarmi që kërkojnë veprim konkret.

Sipas tij, shqetësimet kryesore të qytetarëve lidhen me rritjen e çmimeve, faturat e energjisë, mungesën e vendeve të punës dhe korrupsionin, probleme që, siç shprehet ai, prekin drejtpërdrejt jetën e përditshme të familjeve kosovare.

“Pikërisht këto shifra dhe ky realitet që e prekim çdo ditë në terren me qytetarët janë arsyeja pse jemi të vendosur për ofertën tonë me gjashtë pika, si rrugëdaljen strategjike për Kosovën”, ka shkruar Gjini.

Ai ka theksuar se Aleanca propozon zgjidhje konkrete për sfidat kryesore të vendit, duke përfshirë investimin në gazin amerikan dhe ndërtimin e një termocentrali të ri për siguri energjetike, si dhe lehtësime tatimore për qytetarët dhe bizneset.

Gjini ka përmendur uljen e TVSH-së për ushqimet dhe produktet e higjienës për gratë dhe fëmijët, heqjen e tatimit në pronë për tokën e punuar dhe rritjen e pragut të TVSH-së për bizneset deri në 100 mijë euro.

Kreu i Aleancës ka kërkuar një kthesë të madhe politike, duke thënë se vendit i duhet një qasje që ndalon keqmenaxhimin, zhvillon ekonominë dhe krijon arsye që qytetarët të qëndrojnë e të ndërtojnë të ardhmen e tyre në Kosovë. /Telegrafi/