Gjykata në Prishtinë cakton një muaj paraburgim për dy të dyshuarit për Masakrën e Padalishtës

Gjykata Themelore në Prishtinë – Departamenti Special ka caktuar nga një muaj paraburgim ndaj Zikica Belosevicit, 59 vjeç, dhe Gruica Belosevicit, 56 vjeç, siç njofton Gazeta Sinjali, duke iu referuar njoftimit të gjykatës.

Vendimi u mor më 30 tetor 2026, pas mbajtjes së seancës dëgjimore dhe pasi gjyqtari i procedurës paraprake miratoi kërkesën e Prokurorisë Speciale të Republikës së Kosovës.

Të dy dyshohen se, në bashkëkryerje, kanë kryer veprën penale “Krime lufte kundër popullsisë civile”, në lidhje me Masakrën e Padalishtës në komunën e Istogut.

Sipas arsyetimit të gjykatës, ekziston rrezik real që ata, nëse lihen në liri, t’i shmangen ndjekjes penale dhe të bëhen të paarritshëm për organet e drejtësisë, edhe për shkak se kanë shtetësi të Republikës së Serbisë. Gjykata konstatoi gjithashtu rrezik për pengimin e zhvillimit normal të procedurës penale, ndaj e vlerësoi paraburgimin si masë të nevojshme.

Ata ishin arrestuar një ditë më parë, më 29 tetor, në fshatrat Osojan dhe Cerkolez të Istogut, në kuadër të hetimeve për ngjarjen e 26 marsit 1999.

Personat e përmendur në këtë lajm konsiderohen të pafajshëm derisa fajësia e tyre të vërtetohet me vendim të formës së prerë të gjykatës.