Gjyqtari federal bllokon riorganizimin e planifikuar të Departamentit të Bujqësisë në SHBA

Një gjyqtar federal bllokoi të martën Departamentin amerikan të Bujqësisë (USDA) nga zbatimi i riorganizimit të planifikuar të agjencisë, siç njofton Reuters. Vendimi përbën një goditje për përpjekjen e presidentit Donald Trump për ristrukturim të gjerë të degës ekzekutive.

Vendimi u mor nga Gjykata e Qarkut për Qarkun Verior të Kalifornisë dhe shënon një fitore për sindikatat që kishin paditur për të ndalur riorganizimin, duke argumentuar ndër të tjera se ai do të dobësonte shërbimet e agjencisë. Urdhri ndal përpjekjet e riorganizimit në disa agjenci të USDA-së, përfshirë Shërbimin e Kërkimeve Bujqësore, Shërbimin Pyjor dhe Administratën e Ushqimit dhe të Ushqyerjes.

Gjyqtari Vince Chhabria vlerësoi se agjencia po përdorte fondet e Kongresit për një qëllim tjetër nga ai i parashikuar, përkatësisht për mbylljen e zyrave dhe zhvendosjen e punonjësve. Sipas planit, rreth 2,600 punonjës do të zhvendoseshin nga rajoni i Uashingtonit, ndërsa zyrat e agjencisë do të konsolidheshin në gjithë vendin.

Punonjës të agjencisë kishin paralajmëruar se largimet në shkallë të gjerë për shkak të riorganizimit do të rrezikonin programe që lidhen me tregtinë, ndihmën për jashtë dhe ushqyerjen. Një zëdhënës i USDA-së tha se departamenti po e shqyrton vendimin e gjyqtarit dhe do të paraqesë përgjigjen e tij në gjykatë.

Kreu i Federatës Amerikane të Punonjësve të Shteteve, Qarqeve dhe Bashkive, Patrick Moran, e përshëndeti vendimin, duke thënë se administrata kishte tentuar të zbrazte një agjenci thelbësore me një plan që ai e quajti të paligjshëm dhe të pamenduar.