Gogu komenton raportin e KE: Shqipëria pastroi sistemin me Reformën në Drejtësi

Ministri i Drejtësisë Toni Gogu ka komentuar gjetjet e raportit të fundit të Komisionit Europian për Sundimin e Ligjit, duke vënë në dukje se ky dokument dëshmon ecurinë e Shqipërisë në konsolidimin e sistemit të drejtësisë.

Ai nënvizoi se raporti pasqyron punën e bërë, me fokus të veçantë te përmbyllja e procesit të Vetingut dhe ulja e dosjeve të prapambetura. Ministri theksoi se pas 9 vitesh është bërë një pastrim tërësor dhe i gjithanshëm në drejtësi, që s’është parë në asnjë vend të rajonit.

“Pak ditë më parë u miratua raporti i sundimit të ligjit për Shqipërinë… Është një dokument i hartuar me mendjen dhe sytë e ftohtë të një burokrati europian dhe thotë që Shqipëria po konsolidon Reformën në Drejtësi. Njeh shumë mirë raporti përfundimin e procesit të Vetingut. Pas 9 vjetësh një pastrim tërësor, i gjithanshëm, që s’e ka parë asnjë vend i rajonit… Raporti e vlerëson si etapë historike, konsolidim të pavarësisë dhe integritet të sistemit gjyqësor.”

Përveç arritjeve në dixhitalizim dhe uljen e prapambetjes së dosjeve në Gjykatën e Lartë, ministri tërheq vëmendjen te sfidat që mbeten për t’u adresuar për të rritur më tej besimin e qytetarëve te drejtësia.

“Progresi s’është arsye për t’u vetkënaqur sepse raporti ka edhe gjetje që janë sfiduese për sistemin e drejtësisë, siç janë vonesat në vlerësime, duhet të përshpejtohen procedurat e vlerësimeve, vakancat duhet të mbushen një orë e më parë, lufta kundër korrupsionit të fuqizohet, dhe besimi i qytetarëve të rritet më shumë.”