Gonxhja dhe Buttafuoco takim në Venecia për zgjerimin e bashkëpunimit kulturor mes Shqipërisë dhe Italisë

Në kuadër të Bienales Ndërkombëtare të Artit në Venecia u zhvillua një takim, që solli në fokus forcimin e bashkëpunimit kulturor mes vendit tonë dhe Italisë. Ministri i Turizmit, Kulturës dhe Sportit, Blendi Gonxhja, zhvilloi një takim strategjik me Presidentin e Bienales së Venecias, Pietrangelo Buttafuoco, në kuadër të Bienales së Venecias, ku u diskutua mbi zgjerimin e bashkëpunimit kulturor mes Shqipërisë dhe Italisë dhe forcimin e marrëdhënieve institucionale me Bienalen e Artit dhe Bienalen e Arkitekturës.

Sipas njoftimit zyrtar, në fokus të takimit ishte ndërtimi i një bashkëpunimi afatgjatë në fushën e artit bashkëkohor, arkitekturës, arkivave, dokumentimit dhe edukimit artistik, duke krijuar hapësira të reja bashkëpunimi për artistë, kuratorë, studiues dhe të rinj shqiptarë. “Palët diskutuan mbi zhvillimin e projekteve të përbashkëta për ekspozita, programe shkëmbimi dhe aktivizimin e arkivave artistike si instrumente të rëndësishme të kujtesës kulturore dhe dialogut bashkëkohor, me një vëmendje të veçantë ndaj historisë së pavioneve të Bienales ndër vite. Një pjesë e rëndësishme e diskutimit iu kushtua edhe hapjes së ardhshme të Galerisë Kombëtare të Arteve, e konsideruar si një institucion kyç për zhvillimin e partneriteteve ndërkombëtare dhe për realizimin e ekspozitave të përbashkëta me institucione prestigjioze europiane”, thuhet në njoftimin e MTKS-së. Gjatë takimit u diskutua gjithashtu mbi perspektivën e një pranie më të qëndrueshme të Pavijonit Kombëtar të Shqipërisë në Bienalen e Venecias, si dhe mbi pjesëmarrjen e Shqipërisë në Bienalen e Arkitekturës dhe Bienalen e Artit në vitet në vijim, duke e konsideruar këtë platformë si një instrument të rëndësishëm të promovimit ndërkombëtar të kulturës dhe identitetit krijues shqiptar.

Nga MTKS thuhet se ky dialog do të vijojë së shpejti edhe në Tiranë, me vizita të dedikuara dhe projekte konkrete bashkëpunimi mes institucioneve shqiptare dhe Bienales së Venecias, duke riafirmuar rolin e kulturës si urë lidhëse mes Shqipërisë dhe Italisë. Bienalja Ndërkombëtare e Artit në Venecia është një nga ngjarjet më prestigjioze të artit bashkëkohor në botë. Në hapësirat e Arsenales në Venecia, Shqipëria këtë vit prezantohet me veprën “A Place in the Sun” të artistit Genti Korini.