Gonxhja me ambasadoren e BE-së: Shqipëria avancon drejt Bashkimit Evropian, progres në kulturë dhe pronësinë intelektuale

Ministri i Turizmit, Kulturës dhe Sportit, Blendi Gonxhja zhvilloi një takim me ambasadoren e Bashkimit Evropian në vendin tonë, Sofia Moreira de Sousa, ku në fokus ishte ecuria e procesit të integrimit evropian, projektet e përbashkëta dhe prioritetet në fushat e kulturës, rinisë dhe trashëgimisë kulturore.

Gonxhja bëri të ditur se Raporti i Progresit 2026 i Komisionit Evropian evidenton arritje të rëndësishme në këto fusha, duke vlerësuar pozitivisht reformat dhe përafrimin e legjislacionit shqiptar me standardet evropiane.

Sa i përket kulturës, Kapitulli 26 ka marrë vlerësimin për progres të mirë dhe është mbyllur përkohësisht, një zhvillim që, sipas ministrit, pasqyron angazhimin për zhvillimin e kulturës, bashkëpunimin evropian dhe krijimin e më shumë mundësive për të rinjtë.

Ndërsa në Kapitullin 7, që lidhet me pronësinë intelektuale, është shënuar progres në mbrojtjen e të drejtave të krijuesve dhe përafrimin e legjislacionit me standardet e BE-së, përmes miratimit të Ligjit për të Drejtën e Autorit dhe të Drejtat e Lidhura me të.

Gonxhja theksoi gjithashtu vijimin e kontributit të Shqipërisë në negociatat për kapitujt 1 dhe 29, që lidhen me lëvizjen e lirë të mallrave dhe bashkimin doganor, me vëmendje të veçantë ndaj mbrojtjes dhe qarkullimit të pasurive kulturore.

Një vëmendje e posaçme gjatë takimit iu kushtua edhe Parkut Arkeologjik Bylis–Klos, ku Bashkimi Evropian po mbështet një investim prej 6,25 milionë eurosh, i cili synon ndërthurjen e ruajtjes së trashëgimisë kulturore me zhvillimin ekonomik të komunitetit lokal.

Ministri veçoi gjithashtu rekomandimin e Komisionit Evropian që Këshilli të nisë gjatë vitit 2027 përgatitjet për hartimin e Traktatit të Anëtarësimit të Shqipërisë në Bashkimin Evropian.

Gonxhja shprehu mirënjohjen për mbështetjen e vazhdueshme të BE-së në realizimin e programeve dhe projekteve që kontribuojnë në zhvillimin e artit, krijimtarisë, trashëgimisë kulturore, rinisë dhe sportit, si dhe në promovimin e potencialit turistik të Shqipërisë.