GREQI – 13 viktima pas rritjes së ndjeshme të rasteve me virusin e Nilit Perëndimor

ATHINË, 20 gusht /ATSH-DPA/- Numri i infeksioneve me virusin e Nilit Perëndimor në Greqi është rritur ndjeshëm, me 157 raste të regjistruara në mbarë vendin që nga fillimi i vitit dhe 13 viktima, njoftuan autoritetet shëndetësore.

Sipas agjencisë greke të shëndetit publik EODY, numri i rasteve është pothuajse katërfishuar brenda pak javësh. Në fund të korrikut ishin raportuar vetëm 42 raste.

Disa prej pacientëve kanë zhvilluar forma të rënda të sëmundjes që prekin sistemin nervor qendror, përfshirë encefalitin, meningjitin dhe komplikacione të tjera neurologjike.

Shumica e rasteve janë identifikuar në zonën e Athinës, ndërsa autoritetet kanë shtuar vëmendjen ndaj përhapjes së virusit gjatë periudhës së aktivitetit të lartë të mushkonjave.

Virusi i Nilit Perëndimor transmetohet kryesisht përmes pickimit të mushkonjave të infektuara.

Në pjesën më të madhe të rasteve, infeksioni nuk shkakton simptoma ose shkakton vetëm simptoma të lehta.

Megjithatë, format e rënda prekin më shpesh personat e moshuar dhe njerëzit me disa probleme shëndetësore ekzistuese.

Rritja e rasteve në Greqi vjen në një kohë kur edhe vende të tjera të Evropës Jugore po raportojnë shtim të infeksioneve me virusin e Nilit Perëndimor.

Organizata Botërore e Shëndetësisë ka bërë thirrje për vigjilencë të shtuar dhe masa për të kufizuar ekspozimin ndaj mushkonjave.