GREQI – Dy helikopterë përplasen gjatë shuarjes së zjarreve pranë Athinës

ATHINË, 2 gusht /ATSH-DPA/- Dy helikopterë të angazhuar në operacionet për shuarjen e një zjarri të madh pyjor në perëndim të Athinës janë përplasur në ajër dhe janë rrëzuar, raportoi sot transmetuesi publik grek ERT.

Sipas autoriteteve, pilotët e njërit prej helikopterëve kanë arritur të vendosin kontakt me qendrën e zjarrfikësve përmes radios.

Megjithatë, fati i ekuipazhit të helikopterit të dytë mbetet ende i panjohur.

Shërbimi zjarrfikës grek ka nisur një operacion të gjerë kërkim-shpëtimi në zonën pranë fshatit Psatha, ku ndodhi aksidenti, ndërsa ekipet po punojnë për gjetjen e anëtarëve të ekuipazhit të zhdukur.

Ndërkohë, zjarri i madh që ka përfshirë zonën rreth 50 kilometra në perëndim të Athinës vazhdon të përhapet.

Flakët kanë arritur vetëm pak kilometra larg qytetit të Megarës, i cili ka rreth 36 mijë banorë.

Sipas vlerësimeve paraprake, që nga dita e premte janë djegur mbi 10 mijë hektarë pyje, si dhe dhjetëra shtëpi, stalla dhe sipërfaqe bujqësore, duke shkaktuar dëme të mëdha materiale.

Autoritetet greke vijojnë përpjekjet për vënien nën kontroll të zjarrit, ndërsa operacionet e kërkim-shpëtimit për ekuipazhin e helikopterit të dytë mbeten prioriteti kryesor.